ഒരു അതിജീവനത്തിൻ്റെ കഥ

വിനു വിന്‍സ്റ്റണ്‍

233

2002ല്‍ പുറത്തിറങ്ങിയ ഓസ്‌ട്രേലിയന്‍ ചലച്ചിത്രം ‘റാബിറ്റ് പ്രൂഫ് ഫെന്‍സ് ‘ വ്യത്യസ്തമായൊരു അതിജീവനത്തിന്റെ കഥ പറയുന്നു.

ഡോറിസ് പില്‍കിംഗ്ടണ്‍ ഗരിമാര തന്റെ അമ്മ മോളിയുടെ ജീവിതാനുഭവം മുന്‍നിര്‍ത്തി രചിച്ച, ‘ഫോളോ ദി റാബിറ്റ് പ്രൂഫ് ഫെന്‍സ്’ എന്ന ഗ്രന്ഥമായിരുന്നു, ഫിലിപ്പ് നോയ്‌സ് സംവിധാനം ചെയ്ത ‘റാബിറ്റ് പ്രൂഫ് ഫെന്‍സ്’ ചലച്ചിത്രത്തിന് ആധാരം. ഇരുപതാംനൂറ്റാണ്ടിന്റെ ആരംഭത്തില്‍, ഓസ്‌ട്രേലിയന്‍ സര്‍ക്കാര്‍ കൈക്കൊണ്ട ഒരു പ്രത്യേക തീരുമാനവും, അതേത്തുടര്‍ന്ന് ഒരു വിഭാഗം മനുഷ്യര്‍ നേരിട്ട ഭീകരമായ പ്രതിസന്ധികളുമായിരുന്നു ഈ ഗ്രന്ഥത്തിന്റെയും, ചലച്ചിത്രത്തിന്റെയും ചരിത്രപശ്ചാത്തലം.

ഓസ്‌ട്രേലിയയിലെ കറുത്തവരായ ആദിവാസി വംശജരും വെള്ളക്കാരും കൂടിച്ചേര്‍ന്ന് മുന്‍കാലങ്ങള്‍ മുതല്‍ രൂപപ്പെട്ടിരുന്ന, ‘ഹാഫ് കാസ്റ്റ്’ എന്ന് വിശേഷിപ്പിക്കപ്പെട്ട സങ്കരവര്‍ഗ്ഗം പെരുകുന്നതിനെ നിയന്ത്രിക്കുക എന്ന ലക്ഷ്യത്തോടെ അര്‍ദ്ധവര്‍ഗ്ഗത്തില്‍പ്പെട്ട പെണ്‍കുട്ടികളെ കണ്ടെത്തി മാറ്റി പാര്‍പ്പിക്കുന്ന പതിവ് 1905 മുതല്‍ 1971 വരെ അവിടെ നിലനിന്നിരുന്നു. ഈ കാലയളവില്‍, പടിഞ്ഞാറന്‍ ഓസ്‌ട്രേലിയയിലെ ജിഗലോംഗ് എന്ന ദേശത്ത് താമസമാക്കിയിരുന്ന ഓസ്‌ട്രേലിയന്‍ ആദിവാസി വിഭാഗത്തില്‍ പെട്ട മൂന്ന് പെണ്‍കുട്ടികളെ പിടികൂടുവാന്‍ അധികൃതര്‍ പദ്ധതിയിടുന്നത് മുതലാണ് ചലച്ചിത്രം ആരംഭിക്കുന്നത്. പിതാക്കന്മാര്‍ വെള്ളക്കാര്‍ ആയിരുന്ന പതിനാല് വയസുകാരിയായ മോളി ക്രെയ്ഗും, അവളുടെ എട്ടുവയസുകാരിയായ സഹോദരി ഡെയ്‌സിയും, അവരുടെ ബന്ധുവായ ഗ്രെയ്‌സിയുമായിരുന്നു ആ മൂന്ന് പെണ്‍കുട്ടികള്‍. തങ്ങളുടെ കുട്ടികള്‍ പിടിക്കപ്പെട്ടേക്കും എന്ന ഭയം ഉണ്ടായിരുന്നതിനാല്‍, അവരുടെ രക്ഷിതാക്കള്‍ അപരിചിതരുടെ മുന്നില്‍നിന്നും ഈ കുട്ടികളെ മറയ്ക്കുവാന്‍ ശ്രദ്ധിച്ചിരുന്നു. ആ കാലത്ത് അര്‍ദ്ധവര്‍ഗ്ഗ നിയന്ത്രണനിയമം നടപ്പിലാക്കുവാന്‍ നിയമിക്കപ്പെട്ടിരുന്ന ഉന്നതഉദ്യോഗസ്ഥന്‍ ആ മൂന്ന് പെണ്‍കുട്ടികളെക്കുറിച്ചുള്ള വിവരം അറിഞ്ഞതുമുതല്‍ എത്രയും വേഗം അവരെ പിടികൂടുവാന്‍ കീഴുദ്യോഗസ്ഥര്‍ക്ക് ഉത്തരവ് നല്‍കുന്നു.
1907 ഓടെ, ഓസ്‌ട്രേലിയയുടെ കിഴക്ക് മുതല്‍ പടിഞ്ഞാറ് വരെ എത്തി നില്‍ക്കത്തക്ക രീതിയില്‍ പണിതീര്‍ത്തിരുന്ന പ്രത്യേകതരം വേലിയുടെ സമീപത്തായിരുന്നു ഈ ആദിവാസി കുടുംബങ്ങള്‍ ജീവിച്ചു പോന്നത്. കൃഷികള്‍ നശിപ്പിക്കുന്ന ജീവികളില്‍ നിന്ന് കൃഷിയിടങ്ങള്‍ക്ക് സംരക്ഷണം നല്‍കുക എന്ന ലക്ഷ്യത്തോടെ നിര്‍മ്മിച്ച, മൂവായിരത്തില്‍പരം കിലോമീറ്ററുകള്‍ നീളുന്ന ആ കമ്പിവേലി, ലോകത്തിലെതന്നെ ഇത്തരത്തിലുള്ള വേലികളില്‍ ഏറ്റവും വലുതായി അംഗീകരിക്കപ്പെട്ടിട്ടുള്ളതാണ്. റാബിറ്റ് പ്രൂഫ് ഫെന്‍സ്- അത് തന്നെയാണ് സിനിമയുടെ പേരും.

ഏതാനും ദിവസങ്ങള്‍ക്കുള്ളില്‍ ഈ വേലിയുടെ പശ്ചാത്തലത്തില്‍ വച്ചുതന്നെ, പെണ്‍കുട്ടികളുടെ രക്ഷിതാക്കള്‍ ഭയന്നതുപോലെ അവര്‍ പിടിക്കപ്പെടുകയാണ്. അര്‍ദ്ധവര്‍ഗ്ഗ നിയന്ത്രണ നിയമപ്രകാരം പിടിക്കപ്പെട്ട ആ പെണ്‍കുട്ടികളെ ജിഗലോംഗില്‍ നിന്ന് ആയിരത്തിഅറുനൂറിലേറെ കിലോമീറ്ററുകള്‍ ദൂരെയുള്ള ‘മൂര്‍ റിവര്‍ നേറ്റീവ് സെറ്റില്‍മെന്റി’ലേയ്ക്കാണ് കൊണ്ടുപോകുന്നത്. ട്രെയിനിലും പിന്നീട് ട്രക്കിലുമായി ദിവസങ്ങള്‍ യാത്രചെയ്ത് അവര്‍ എത്തിച്ചേരുന്നത് തികച്ചും അപരിചിതവും, എന്നാല്‍ തങ്ങളെപ്പോലെയുള്ള കുറെ പെണ്‍കുട്ടികള്‍ പാര്‍ക്കുന്നതുമായ ഒരു ക്യാമ്പിലേയ്ക്കാണ്.
ബലം പ്രയോഗിച്ച് അവരെ ക്യാമ്പില്‍ എത്തിക്കുവാന്‍ ഉദ്യോഗസ്ഥര്‍ക്ക് കഴിഞ്ഞുവെങ്കിലും, ഏതുവിധേനയും അവര്‍, പ്രത്യേകിച്ച് മോളി നാട്ടില്‍ തിരികെ എത്തണമെന്ന് നിശ്ചയിച്ചിരുന്നു. മഴക്കാറുകള്‍ മൂടിയ ഒരു ദിവസം മോളി തന്റെ സഹോദരിമാരെയും കൂട്ടി തിരികെ പോകുവാന്‍ തീരുമാനമെടുക്കുകയാണ്. ചലച്ചിത്രത്തിന്റെ ആരംഭത്തില്‍, ചെറുമൃഗങ്ങളെ വേട്ടയാടുന്നതിലും, ലക്ഷണങ്ങളിലൂടെ കാടിനെ മനസിലാക്കുന്നതിലും വിദഗ്ദയായി അവതരിപ്പിച്ചിരുന്ന മോളിക്ക്, മഴക്ക് തങ്ങളെ ശത്രുക്കളില്‍ നിന്ന് മറയ്ക്കാനാവുമെന്ന് അറിയാമായിരുന്നു.
പതിനാല് മുതല്‍ എട്ട് വയസ് വരെ പ്രായമുള്ള ആ പെണ്‍കുട്ടികള്‍, ആയിരത്തിഅഞ്ഞൂറ് മൈലുകള്‍ കാല്‍നടയായി സഞ്ചരിക്കുവാന്‍ തീരുമാനമെടുക്കുന്നു! ചലച്ചിത്രത്തിനായി സൃഷ്ടിച്ച ഒരു കഥയുടെ ഭാഗം മാത്രമായിരുന്നു ഇതെങ്കില്‍, പ്രേക്ഷകര്‍ തീര്‍ച്ചയായും അത് സ്വീകരിക്കുമായിരുന്നില്ല. എന്നാല്‍, ചിലപ്പോഴെങ്കിലും മനുഷ്യചരിത്രത്തില്‍ ചില യഥാര്‍ത്ഥ്യങ്ങള്‍ കെട്ടുകഥകളെക്കാള്‍ അവിശ്വസനീയമായി മാറുന്നു എന്ന വസ്തുത, ഈ ആഖ്യാനത്തെ ബലവത്താക്കുന്നു. അതെ, തുടര്‍ന്നുള്ള രണ്ടു മാസങ്ങളിലേറെയുള്ള ദിനരാത്രങ്ങള്‍കൊണ്ട് ആ പെണ്‍കുട്ടികള്‍ നടന്നുതീര്‍ത്തത് അത്രയും ദൂരമാണ്.

അതീവ ബുദ്ധിമതിയായ മോളി ക്രെയ്ഗ് എന്ന 14 വയസ്സുകാരിയുടെ ഇച്ഛാശക്തിയോടെയുള്ള നേതൃത്വം സിനിമയിലുടനീളം നമുക്ക് കാണാവുന്നതാണ്. അവരുടെ ദേശം വരെ നീളുന്ന റാബിറ്റ് പ്രൂഫ് ഫെന്‍സ് കണ്ടെത്തുവാന്‍ കഴിഞ്ഞതാണ് ആ യാത്രയില്‍ വഴിത്തിരിവായി മാറുന്നത്.ഈ മൂന്ന് കുട്ടികള്‍ അപ്രത്യക്ഷരായിരുന്ന ഒമ്പത് ആഴ്ചക്കാലവും, ഒരു വലിയ സര്‍ക്കാര്‍ സംവിധാനം മുഴുവന്‍ അവരെ തെരയുന്നതിനായി അവര്‍ കടന്നുപോകുവാന്‍ ഇടയുള്ള വഴികളിലൂടെ പരക്കം പാഞ്ഞ് നടന്നിരുന്നു. കുതിരപ്പുറത്തും, വാഹനങ്ങളിലും സഞ്ചരിച്ച് ദിനരാത്രങ്ങളോളം തേടിയിട്ടും അവരെ കണ്ടത്താനായില്ല.
സിനിമയുടെ തുടക്കവും ഒടുക്കവും ഓസ്‌ട്രേലിയന്‍ ആദിവാസികളുടെ ഭാഷയിലാണ്. അത് യഥാര്‍ത്ഥ മോളി ക്രെയ്ഗിന്റെ സ്വരം തന്നെയാണ് എന്നത് സിനിമയുടെ ചരിത്രപരമായ പ്രാധാന്യത്തെ ഉയര്‍ത്തിക്കാണിക്കുന്നു. ‘ഇത് ഒരു യഥാര്‍ത്ഥ സംഭവമാണ്’ എന്ന വാക്കുകളോടെ മോളി തന്നെ കഥ പറഞ്ഞുതുടങ്ങുന്നു. വെള്ളക്കാര്‍ എപ്രകാരമാണ് തങ്ങള്‍ക്കിടയിലേയ്ക്ക് കടന്നെത്തിയത് എന്ന് തന്റെ അമ്മ പറഞ്ഞുകേട്ട അറിവും അവള്‍ ആമുഖമായി പറഞ്ഞുവയ്ക്കുന്നു്.
മൂന്നുമാസക്കാലം നീണ്ടുനിന്ന ഒരു വ്യത്യസ്ഥമായ യാത്രയുടെ കഥ പറഞ്ഞവസാനിപ്പിച്ചതിനു ശേഷം സംവിധായകനായ ഫിലിപ്പ് നോയ്‌സ് ക്യാമറ യഥാര്‍ത്ഥ മോളിയിലേയ്ക്ക് തിരിക്കുന്നു. തുടര്‍ന്ന് തങ്ങളുടെ ജീവിതത്തില്‍ സംഭവിച്ച കാര്യങ്ങള്‍ മോളിയാണ് വിവരിക്കുന്നത്. തിരിച്ചെത്തിയ അവര്‍ ഇരുവരും പിന്നീട് വിവാഹിതരാവുകയും മോളിക്ക് രണ്ടു മക്കള്‍ ജനിക്കുകയും ചെയ്തു. എന്നാല്‍, ഇളയ മകള്‍ അന്നബെല്ല കൈക്കുഞ്ഞ് ആയിരിക്കേ, വീണ്ടും ഒരിക്കല്‍ക്കൂടി മോളി കുഞ്ഞുങ്ങള്‍ ഉള്‍പ്പെടെ പിടിക്കപ്പെടുകയും, പഴയ ക്യാമ്പിലേയ്ക്ക് തന്നെ അയയ്ക്കപ്പെടുകയും ഉണ്ടായി. മുമ്പ് താന്‍ യാത്ര ചെയ്ത വഴികളിലൂടെ തന്നെ, കൈക്കുഞ്ഞിനെയും എടുത്തുകൊണ്ട് അവള്‍ വീണ്ടും നടന്ന് ജിഗലോംഗില്‍ തിരികെയെത്തി. പക്ഷേ, മൂന്ന് വയസുള്ളപ്പോള്‍ വീണ്ടും തട്ടിക്കൊണ്ടുപോയ അന്നബെല്ലയെ തനിക്ക് പിന്നീട് കാണാന്‍ കഴിഞ്ഞിട്ടില്ലെന്ന് മോളി പറയുന്നു. ആദ്യയാത്രയ്ക്കിടെ പിടിക്കപ്പെട്ട ഗ്രെയ്‌സി പിന്നീട് അവളുടെ മരണം വരെയും തിരികെ വന്നിട്ടില്ല.
ആ കാലത്ത് സ്വന്തം ദേശത്തുനിന്നും നിര്‍ബ്ബന്ധിതമായി പറഞ്ഞയയ്ക്കപ്പെട്ട തലമുറകള്‍ ‘സ്‌റ്റോളന്‍ ജനറേഷന്‍സ്’ എന്നാണ് ഇന്നും അറിയപ്പെടുന്നത്. ഇത്തരമൊരു നിയമനിര്‍മ്മാണവും, അതിന്റെ അടിച്ചേല്‍പ്പിക്കലും സൃഷ്ടിച്ച ആഘാതം ഇന്നും അവിടെ അവശേഷിക്കുകയാണ്. ആധുനിക മനുഷ്യന്റെ സ്വാര്‍ത്ഥപൂര്‍ണ്ണമായ അധിനിവേശം ചവിട്ടിമെതിയ്ക്കുന്ന അനവധി നിഷ്‌കളങ്കജീവിതങ്ങള്‍ക്കുവേണ്ടി, പ്രത്യേകിച്ച്, ഇരുപതാംനൂറ്റാണ്ടിലെ ആദ്യ ഏഴ് പതിറ്റാണ്ടുകളില്‍ കണ്ണീരിലാഴ്ന്ന ഒട്ടേറെ കുടുംബങ്ങള്‍ക്കുവേണ്ടി കാലാതിവര്‍ത്തിയായി ലോകത്തോട് സംസാരിക്കുന്ന സംഭവകഥയാണ്, റാബിറ്റ് പ്രൂഫ് ഫെന്‍സ്.
ചരിത്രത്തിന് ചിറകുകള്‍ നല്‍കിയ ഈ ചലച്ചിത്രത്തില്‍, മോളി ക്രെയ്ഗിന് ജീവന്‍ പകര്‍ന്നത്, എവര്‍ലിന്‍ സാംപിയാണ്. ഡെയ്‌സി ക്രെയ്ഗിനെ ടിയാന സാന്‍സ്ബറിയും, ഗ്രെയ്‌സി ഫീല്‍ഡ്‌സിനെ ലോറ മോനഗനും അവതരിപ്പിച്ചിരിക്കുന്നു.

വായിക്കാം  http://bit.ly/2rYL1Nu

You might also like